Liquiça, 12 Fevereiru 2026| Sua Excêlencia Secretário de Estado das Florestas (SEF) Eng. Fernandino Vieira da Costa, S.Hut, Partisipa iha Lansamentu Regulamentu Suku no Mapa uza Rai ba Futuru liu-husi Serimónia Kultura Tara-Bandu hodi Hametin Unidade Entre Komunidade sira hodi Proteje no Haburas Rekursus Naturais liu-liu Florestas, iha Suku Tibar, Postu Administrativu Bazartete, Munisípiu Liquiça.
Serimónia promove kultura Tara-bandu ne'e hetan apoiu husi tékniki husi Associação Halarae no mós hetan fiar no apoiu husi JICA, iha Timor-Leste no Ministériu da Agricultura, Pecuária, Pesca e Floresta(MAPPF), liu husi Secretário de Estado das Florestas(SEF) iha Direção Geral Floresta(DGF).
Intervensaun Sua Excêlencia Secretário de Estado das Florestas, informa Tara-Bandu ne'e hanesan kultura lei Tradisionál Timor-Leste nian ne'ebé Beiala sira implementa hodi respeita malu, ho nune'e ita kontinua promove kultura Tara-Bandu ida ne'e hodi fo protesaun no konservasaun ba biodiversidade balada fuik sira no labele estraga rekursus Florestas, ai-laran sira ne'ebé moris natural.
Tanba ne'e parseiru dezenvolvimentu Assosiasaun HALARAE, Luta ba Futuru(LBF), no Japan Internasional Cooperation Agency (JICA-GCF), iha Timor-Leste hetan apoiu husi Secretário de Estado das Florestas(SEF), Direção Geral Floresta(DGF) hala'o konsultasaun ho Autoridade Lokál Xefe Suku, Xefe Aldeia no Komunidade sira durante fulan neen nia laran oinsa bele implementa atividade Tara-Bandu ne'e iha Suku Tibar .
"Objetivu husi Promove Tara-Bandu no Regulamentu Suku nian ne'e hodi kria paz, unidade no hakmatek iha sosiedade ne'ebé sira moris ba loron-loron, katak respeita malu entre Ema ho Ema, respeita Autoridade lokal sira, respeita ita nia Veterano, Veterana sira, Katuas, Ferik, Inan ho Aman, Oan, Bei-Oan no Ema ho Rekursus Naturais, Biodiversidade sira hodi nune'e maka ita bele dezenvolve nia rai ne'e ba oin" dehan S.E.SEF.
S.E.SEF, husu ba Inan-Aman sira iha Suku Tibar atu para ona tesi ai tanba liu husi pratika tesi ai arbiru maka sei fo riaku ba ita nia moris no mós ba dezenvolvimentu iha rai laran, ezemplu hanesan akontesimemtu ida iha nasaun vijinu Indonesia iha Sumatra ne'e impaktu husi tesi ai halo rai monu hanehan ema barak mak mate no lakon vida too buka la hetan. Tamba nee husu ba komunidade sira labele tesi ai arbiru" dehan S.E.SEF.
Partisipa iha atividade Tara-bandu ne'e, Sua Excelência SEF, Diretór Agrikultura Munisípiu Liquiça, Reprezenta Prezidente Autoridade(PAM) Munisípiu Liquiça, APA-Bazartete, Comandante PNTL, Postu Adm. Bazartete, Diretór HALARAE, Xefe Departementu Reflorestasaun, Xefe Teritoriál Floresta Munisípiu Likisa, Xefe Suku Comoro, Xefe Suku Lahane, Xefe Suku no Xefe Aldeia sira hotu no Partisipa masimu husi Lia Nain no Komunidade sira hotu.
#Média G-SEF
